Ko je bio Ebrahim Raisi?

FOTO: Screenshot/ YouTube

Karijeru je započeo odmah poslije Islamske revolucije 1979. kada je sa samo dvadeset godina postao državni tužilac u Karadžu. Kasnije je bio i sudija, a od 2019. je bio prvi čovjek pravosuđa u zemlji

Pobjeda Ebrahima Raisija bila je tako ubjedljiva da nema potrebe za drugim krugom izbora. A opet, ostaće upamćeno da je izlaznost bila možda i najniža u istoriji. Posmatrači tvrde da su predsjednički izbori od početka bili manipulisani – izglednim protivkandidatima nije bilo dopušteno da se kandiduju, a oni bliski režimu su povlačili kandidature, piše DW.

Na prošlim izborima 2017. je Raisi izgubio od Hasana Rohanija, umjerenog predsjednika koji, poslije dva mandata, više nije imao pravo da se kandiduje.

Rođen je prije 60 godina u strogoj muslimanskoj porodici u iranskoj metropoli Mašadu, gdje je grobnica Imama Reze – važno mjesto za šiitske hodočasnike. Raisi je prošao teološko obrazovanje i ima rang hodžatoleslama (autoritet islama) – iznad toga je samo ajatolah.Karijeru je započeo odmah poslije Islamske revolucije 1979. kada je sa samo dvadeset godina postao državni tužilac u Karadžu. Kasnije je bio i sudija, a od 2019. je bio prvi čovjek pravosuđa u zemlji.

Jedna epizoda duboko se ucrtala u njegovu biografiju. Amnesty International ga optužuje da je 1988, kada je zvanično bio zamjenik tužioca na Revolucionarnom sudu u Teheranu, bio dio „komisije smrti” koja je sprovodila egzekucije bez sudske odluke. Tako je pobijeno najmanje pet hiljada protivnika klerikalnog režima, procjenjuje Amnesty.

Nakon objavljivanja tog izvještaja, administracija Donalda Trumpa i Evropska unija su 2019. godine stavila Raisija na listu sankcija.

To što je čovjek postao predsjednik umjesto da odgovara za zločine protiv čovječnosti jeste „gorko podsjećanje da u Iranu vlada nekažnjivost”, rekla je tada Anješ Kalamar, generalna sekretarka Amnestyja.

Najveći problemi: Sankcije i ekonomija

Kada je preuzeo predsjedničku dužnost, bilo je nade da će Raisi nastaviti pregovore kako bi se Iran vratio u Atomski sporazum koji je zaključen 2015. godine, ali koji je svojevremeno jednostrano napustio Vašington pod palicom Donalda Trumpa. Sporazum predviđa da Iran dozvoljava kontrole nuklearnih postrojenja i da ne obogaćuje uranijum u mjeri potrebnoj za nuklearnu bombu, dok, zauzvrat, zapadne zemlje ukidaju sankcije.

U kampanji je Raisi kritikovao sporazum, ali i nagovještavao da se na njemu radi: „Poštovaćemo sporazum, ali uslove postavljamo mi, a ne SAD.”

Uostalom, ekonomske nedaće Irana su se znatno pogoršale povratkom oštrijih sankcija. Raisi je zatekao zemlju koju izjeda inflacija od 40 odsto godišnje. „Patnje našeg naroda zbog nestašica su realne”, rekao je on nakon glasanja.

Posmatrači nakon Raisove pobjede su govorili o još tvrđoj retorici prema vječnom neprijatelju Izraelu i, možda, dodatno suzbijanje slobode mišljenja u zemlji. Kao šef pravosuđa je Raisi kumovao zabrani upotrebe aplikacije Signal koja služi sigurnoj razmjeni poruka. U januaru je Signal saopštio da su iranski cenzori uspjeli da prekinu veze te da ova aplikacija više nema prolaza u Iranu.

Raisi je počeo mandat sa podrškom najvažnijeg čovjeka Irana, ajatolaha Alija Hameneija. Tokom kampanje je on nazvao Raisija „iskusnim čovjekom vrijednim povjerenja”. Dok u Teheranu predsjednik vodi dnevne političke poslove, Vrhovni vođa Hamenei diktira suštinski pravac razvoja zemlje.